Heinz Tappeiner war der erste Trainer (Spielertrainer) der Obermaiser Fussballmannschaft Saison 1973/74.

Griastenk Fuasbollkollegen aus olter Zeit!

Es freit mi, dass ins die Verontwortlichen des FCO zur 50 Johr Feier inglodn hobm.
Miar hobn domols a tolle Monnschoft ghobt, de hattn olle a ohne Trainer spieln kennt.
Jeder hot gwisst wos er zu tian hot. I mecht kuane uanzelnen Spieler hervorheben, ober erwähnen mecht i decht a poor.
Do war amoll inser umsichtiger Libero, der Mair Walter, nocher der Mair Oswald, den hobn sie in schworzn Mair ghoassn, er hot auf olle Positionen spieln kennt.
Der Gögele Toni wor Verteidiger, den hot man foscht miassn mit an Bandl unhängen, er hot schun domols in heintign Fuaßboll in Kopf ghobt, weil er gearn noch vorn marschiert isch. Er isch ober nor ollm wieder schnell zrugg grennt.
Nit zu vergessen war a nou der Höller Hansi, der mit seinen Dribblkünstn die Verteidiger oft schwindlig gspielt hot.
Wos ins olle load tuat, isch, dass ins zwoa auf der Welt zu friah verlossn hobn miassn,inser Kapitän der Schuan Albert und der Rainer Bernhard.
Früher hots nou kuan Pressing oder 3, 2 ,4, 1 System geben , in der Verteidigung worn zwoa Verteidiger, a Stopper, a Libero , des wor domols normal.
I konn mi nou guat erinnern, wie i in Trainerkurs vom Fuaßbollverbond gmocht hon, hot ins a olter italienischer Nationalspieler gsogg, „wichtig isch, hintn guat zua mochn, denn jede Monnschaft, wenn sie a nou sou schwoch isch, hot während der 90 Minuten a Gelegenheit a Tor zu schiaßn, und wenns a lei an Eigentor isch.“
Er hot gsogg “ am Ende der Meisterschoft, schaugn sie lei wieviel Punkte du gmocht hosch, und nit wia sie zustond kemmen sein.
In die Jungen, de die heintigen guatn Sportplatz gwöhnt sein, miassn miar sogn, dass domols die Sportplatz in Meran knopp worn. Insere Trainingszeitn worn von uans bis drei mittogs aufn Viehmorktplotz, do hobn miar a insere Meisterschoftsspiele ausgetrogn.
Wos i a nou ollm in Erinnerung hon, isch, dass der Klotzner Hermonn, der nochn Alber Franz Präsident wor, nochn Spiel oft die lettigen Schuach der Buabn gwaschn hot.
Donkn mecht i a nou in de Leit, de den schianen Fuaßbollplotz do gschoffn hobn. I woaß zwor nit genau, wer do olls federführend wor. I denk mir holt, der Januth Günther, der Verdorfer Bernhard, der Gögele Hias und viele ondere a nou.
Zum Schluss mecht i mi nou bei olle Spieler und dem Vorstond des Fuaßbollclub Obermoas fir die zwoa schianen Johr bedonkn.
Heinz Tappeiner